Responsible Statecraft-ի գլխավոր խմբագիր Բեն Արմբրուստերը հոդված է հրապարակել, որ վերնագրված է «Իսրայելի նախկին պաշտոնյան Սպիտակ տանը ղեկավարում է Իսրայելի և Իրանի հարցերով բաժինը»։
Radar Armenia-ն ներկայացնում է այդ հոդվածը.
«Իսրայելի պաշտպանության նախարարության նախկին պաշտոնյա Մերավ Ցերենը ղեկավարում է Ազգային անվտանգության խորհրդում (NSC) Իսրայելի և Իրանի հարցերով բաժինը: Drop Site News-ի հաղորդագրությունը հայտնվեց այն ժամանակ, երբ Թրամփի վարչակազմը բանակցություններ էր վարում Իրանի հետ՝ վերջինիս միջուկային ծրագիրը սահմանափակելու նպատակով, ինչին կտրուկ դեմ են Վաշինգտոնում դիվանագիտության փոխարեն Իսրայելի հետ պատերազմի շատ կողմնակիցներ։
Սպիտակ տունը հաստատել է Ցերենի նշանակումը NSC-ում՝ նրան անվանելով «հայրենասեր ամերիկացի»: Drop Site-ը նշում է, որ նրա՝ այդ դերում գտնվելը Իսրայելին «անսովոր առավելություն է տալիս ներքաղաքական քննարկումներում, հենց այն պահին, երբ Իսրայելի կառավարությունը նոր արշավ է սկսել՝ ճնշում գործադրելու ԱՄՆ կառավարության վրա՝ Իրանի հետ պատերազմ սկսելու համար, ոչ թե շարունակելու բանակցությունները միջուկային համաձայնագրի ուղղությամբ»:
Իրոք, վարչակազմի ներքին քննարկումները Իրանի վերաբերյալ անցյալ շաբաթ բացահայտվեցին, երբ New York Times-ը հայտնեց, որ նախագահ Թրամփը հորդորել է Իսրայելին՝ զերծ մնալ Իրանի միջուկային օբյեկտների վրա անմիջապես կատարվելիք հարձակումից: Թրամփի վարչակազմի բարձրաստիճան պաշտոնյաների լայն շրջանակ, ներառյալ՝ փոխնախագահ Ջեյ Դի Վենսը, Ազգային հետախուզության տնօրեն Թուլսի Գաբբարդը, պաշտպանության նախարար Փիթ Հեգսեթը և Սպիտակ տան աշխատակազմի ղեկավար Սյուզի Ուայլսը, աջակցել են Թրամփի որոշմանը:
Ցերենը նախկինում եղել է ազգային անվտանգության գիտաշխատող Վաշինգտոնում գործող Ժողովրդավարությունների պաշտպանության հիմնադրամում (FDD)։ Սա Իսրայելի շահերը պաշտպանող վերլուծական կենտրոն է։ Ցերենը X-ում (նախկին Twitter) կիսվել է բովանդակությամբ, որը կա՛մ քննադատում էր նախագահ Օբամայի՝ 2015 թվականին Իրանի հետ կնքված միջուկային համաձայնագիրը, կա՛մ Իրանի նկատմամբ պատժամիջոցների վերացումը։ Այս հանգամանքն, ամենայն հավանականությամբ, անհրաժեշտ կլինի Թրամփի կողմից Իրանի հետ հնարավոր համաձայնագրի դեպքում:
FDD-ում Ցերենի կենսագրության մեջ նշվում է. «Նախկինում նա աշխատել է Իսրայելի պաշտպանության նախարարությունում, որտեղ մասնակցել է Հորդանան գետի արևմտյան ափին ընթացող բանակցություններին՝ Իսրայելի կառավարության տարածքներում գործողությունների համակարգողի և Պաղեստինի իշխանության պաշտոնյաների միջև»: Drop Site-ը նշում է, որ այն իսրայելական գերատեսչությունը, որտեղ նա աշխատել է, «այժմ արգելում է մարդասիրական օգնության մուտքը Գազայի հատված, ինչը հանգեցրել է աննկարագրելի մարդասիրական ճգնաժամի»:
Պատրաստեց՝ Արման Գալոյանը
