Արցախի նախագահ Սամվել Շահրամանյանն Արցախի հանրային հեռուստաընկերությանը տված հարցազրույցում խոսել է մի շարք հարցերի շուրջ։ Նա պատմել է այն մասին, թե ինչպես սկսվեց պատերազմը։  

«Սեպտեմբերի 19-ի առավոտյան ադրբեջանական հենակետից մոտեցել են ռուսական հենակետի ավագին և զգուշացրել, որ թաքցնեն աշխատակազմը, քանի որ շուտով կաշխատի հրետանին։ Մենք այդ մասին ասել ենք խաղաղապահներին, իրենք էլ էին տեղյակ։ 

Ռազմական գործողություններն սկսվելուց հետո հասկացել եմ, որ մենակ ենք։ Ռուսական կողմը գտնվում էր դիտորդի կարգավիճակում։  ՊԲ-ի, այլ ուժային կառույցների և մեր բնակչության հետ միասին սկսել ենք պատասխան գործողություններ, որոնց շնորհիվ էլ հնարավոր եղավ ադրբեջանական կողմի հետ բանակցություններ սկսել, որը տևել է 12 ժամ»,- նշել է Շահրամանյանը։

Նրա խոսքով՝ հենց սկսզբից էլ պարզ էր, որ անհրաժեշտ է կանգնեցնել ռազմական գործողությունը, ուժերն անհավասար էին, և ինչքան երկար շարունակվեր ռազմական գործողությունը, այնքան շատ զոհեր և կորուստներ կունենայինք։

«Ստիպված էի ուղիղ կապ հաստատել ադրբեջանական կողմի բարձրաստիճան ներկայացուցիչների հետ, որոնք ինձ ծանոթ էին և նախկինում էլ Արայիկ Հարությունյանի հետ ունեցել էին կապ։ Առաջինն ինձ փոխանցեցին, որ մինչև չհասնեն վերջնական նպատակին, չեն դադարեցնի գործողությունները»,- պատմել է Արցախի նախագահը։

Շահրամանյանը նշել է, որ ընդունել են մի փաստաթուղթ, որը նախատեսում էր սեպտեմբերի 20-ին դադարեցնել ռազմական գործողությունները։ «Մեզ համար անընդունելի էր ՀՀ զինված ուժերի մնացորդների դուրսբերման ձևակերպումը, բայց դա ադրբեջանական կողմի պնդումն էր»,- ասել է նա։

Թե ինչո՞ւ զենքը դուրս չի բերվել ԼՂ-ից, Շահրամանյանը պատասխանել է․ «Ծանր տեխնիկայով չէինք կարող դուրս գալ Արցախից։ Այդ մասին խոսելն անիմաստ է, քանի որ ադրբեջանական կողմը տեղադրել էր հսկիչ անցակետ։ Սպառազինությունը հանձնել ենք ռուսական կողմին, դա պիտի ոչնչացվեր՝ ըստ պայմանավորվածության»։