Արցախ
Միջազգային սոցիալիստական շարժումն Ադրբեջանին կոչ է արել անհապաղ բացել Լաչինի միջանցքը
Սոցիալիստական ինտերնացիոնալը հայտարարություն է տարածել, որում Ադրբեջանի կառավարությանը հորդորել է անհապաղ և անվերապահորեն բացել Լաչինի միջանցքն ու ապահովել մարդկանց ու ապրանքների տարանցումը երկու ուղղություններով՝ համաձայն իր միջազգային պարտավորությունների և միջազգային դատարանների կողմից պարտադիր իրավակիրառություն ենթադրող որոշումների։
Հայատարարության մեջ, մասնավորապես, ասված է․
«Սոցիալիստական ինտերնացիոնալը խորապես մտահոգված է Լեռնային Ղարաբաղում ահագնացող հումանիտար ճգնաժամով։ Ադրբեջանի կողմից Լաչինի միջանցքի շարունակական շրջափակումը պատճառ է հանդիսացել անտանելի իրավիճակի և մի քանի ամիս ձգվող շրջափակման։ Հայաստանից սննդամթերքի, դեղորայքի, գազի և էլեկտրականության մատակարարումներից զրկվածությունն արագորեն հանգեցնում է տարածաշրջանում սովի և հումանիտար աղետի։
2022թ․ դեկտեմբերի 12-ից Լաչինի միջանցքի փակմանն ուղղված ադրբեջանական քաղաքականությունը, 2023թ․ հունվարի 9-ից Հայաստանից Արցախը սնուցող միակ բարձրավոլտ էլեկտրահաղորդման գծի խափանումը, 2023թ․ մարտի 21-ից գազի մատակարարումների խափանումը և ավելին՝ 2023թ․ հունիսի 15-ից ամբողջական շրջափակումը Լեռնային Ղարաբաղի բնիկ հայ ժողովրդի կենսապայմանների վրա աղետալի ազդեցություն ունեն։
Մենք նկատի ենք առնում այն, որ 2023 թվականի հունիսի 15-ից Ռուսաստանի խաղաղապահ ուժերի և Կարմիր խաչի միջազգային կոմիտեի կողմից նախկինում իրականացված պարենի, դեղորայքի և առաջին անհրաժեշտության այլ ապրանքների մատակարարումները դադարեցվել են Ադրբեջանի կողմից Լաչինի միջանցքի շրջափակման պատճառով։ Այդ շարունակական շրջափակումը խախտում է Լաչինի միջանցքի վերաբերյալ Արդարադատության միջազգային դատարանի և Մարդու իրավունքների եվրոպական դատարանի ընդունած՝ իրավաբանորեն պարտադիր որոշումները:
Սոցիալիստական ինտերնացիոնալը խորապես անհանգստացած է նաև Լեռնային Ղարաբաղի ժողովրդի նկատմամբ վերահաս ցեղասպանության սպառնալիքի վերաբերյալ ահազանգներից՝ բարձրացված հեղինակավոր մասնագետների և համապատասխան ինստիտուտների կողմից, ինչպիսիք են Ցեղասպանության կանխարգելման Լեմկինի ինստիտուտը և Միջազգային քրեական դատարանի առաջին գլխավոր դատախազ Լուիս Մորենո Օկամպոն։
Սոցիալիստական ինտերնացիոնալն Ադրբեջանի կառավարությանը հորդորում է անհապաղ և անվերապահորեն բացել Լաչինի միջանցքն ու ապահովել մարդկանց ու ապրանքների տարանցումը երկու ուղղություններով՝ համաձայն իր միջազգային պարտավորությունների և միջազգային դատարանների կողմից պարտադիր իրավակիրառություն ենթադրող որոշումների։ Մենք նաև Հայաստանի և Ադրբեջանի մեր անդամ կուսակցություններին հորդորում ենք միասին աշխատել՝ ապահովելու համար Լեռնային Ղարաբաղի հակամարտության կայուն լուծումը։
Կոչ ենք անում միջազգային հանրությանը՝ ակտիվացնել Լաչինի միջանցքի շրջափակումը դադարեցնելու կոչով Ադրբեջանի իշխանություններին դիմելու ջանքերը»։
