«Հայաստան» համահայկական հիմնադրամը Արցախում իրականացնում է բազմաբնույթ և լայնածավալ ծրագրեր: Դրանցից է նաև բնակարանաշինության ծրագիրը։
Radar Armenia-ի հարցմանն ի պատասխան՝ հիմնադրամից տեղեկացրին, որ Արցախում բազմաբնակարան շենքեր է կառուցվում, իսկ ոմանք արդեն ավարտված են։ Բացի այդ՝ ջրամատակարարման համակարգերի վերակառուցման աշխատանքներ են իրականացվում Հաթերք, Չլդրան, Ճարտար և Բերդաշեն համայնքներում:
Անդրադառնալով բնակարանաշինությանը՝ հիմնադրամից նշեցին, որ բազմաբնակարան շենքեր են կառուցվում Ստեփանակերտի Թումանյան և Տիգրան Մեծ փողոցներում, Աջափնյակ թաղամասում, Առաքելյան փողոցում Ասկերանի շրջանի Իվանյան և Հովսեփավան համայնքներում, որոնք հիմնականում նախատեսած են Հադրութի, Շուշիի, Մեծ Թաղերի, Ուղտասարի բնակիչների համար:
Նոր բնակարանների շահառուները 44-օրյա պատերազմում զոհված զինծառայողների, տեղահանված, բազմազավակ և առաջին խմբի անժամկետ հաշմանդամություն ունեցող անձանց ընտանիքներն են: Նրանց ընտրությունն իրականացնում է ԱՀ սոցիալական զարգացման և միգրացիայի նախարարությունը՝ իր իսկ կողմից սահմանված չափորոշիչներին համապատասխան։
Ըստ հիմնադրամի՝ այդկերպ, Ստեփանակերտի Թումանյան փողոցում կառուցվում է 261 բնակարան։ Բացի դա՝ ևս 300 ընտանիք Թումանյան փողոցում ս.թ. հունվարին արդեն իսկ բնակարանամուտ է տոնել։
Բացի դա՝ Ստեփանակերտի Տիգրան Մեծ փողոցում կառուցվում է 224 բնակարան, Ասկերանի շրջանի Իվանյան համայնքում՝ 186 բնակարան և 90 առանձնատուն։ Աջափնյակ թաղամասում կառուցվում է 240 բնակարան, Ստեփանակերտի 6-րդ դպրոցի վերակառուցմամբ էլ կավելանա 30 բնակարան։
Այս ամենին կմիանան նաև Հովսեփավանի նորակառույց 32 առանձնատները։
Ընդհանուր առմամբ՝ բնակարաններով է ապահովվելու 1063 ընտանիք:
Ոսկեհատ Պողոսյան
