Հայ-իրանական դիվանագիտական հարաբերությունների հաստատման 30-ամյակի շրջանակում Սոս Սարգսյանի անվան Համազգային թատրոնը կմեկնի Իրան:
Թատերախումբը Թեհրանում և Սպահանում կներկայացնի Հովհաննես Թումանյանի «Լոռեցի Սաքոն» ստեղծագործության համանուն բեմադրությունը:
Ըստ «Արմենպրես»-ի՝ թատրոնի գեղարվեստական ղեկավար Նարինե Գրիգորյանը նշել է, որ մասնակցելու են «Ֆաջր» փառատոնին, որն անցկացվելու է փետրվարի 6-15-ը: Նա նշել է, որ երկու երկրների միջև դիվանագիտական հարաբերությունների հաստատման 30-ամյակի շրջանակում մի շարք նախաձեռնություններ են կյանքի կոչելու: ՀՀ-ում ԻԻՀ դեսպանատան մշակույթի կենտրոնի հետ համագործակցությամբ իրանցի ռեժիսոր Ջոնաս Մոհամադին արդեն նկարահանել է «6.60» կինոնկարը, որը շուտով կներկայացնեն հանդիսատեսի դատին: Ռեժիսոր Անահիտ Աբադը բեմադրում է իրանական էպոսը, Համազգային թատրոնում իրանական պիեսների թատերայնացված ընթերցանություններ են լինելու: Անդրադառնալու են ժամանակակից դրամատուրգների գործերի, ներկայացնելու են Ֆիդուսիի «Շահնամեն» և այլ գործեր:
