Radar Armenia-ի զրուցակիցն է միջազգայնագետ Շահան Գանտահարյանը։
- ՌԴ նախագահ Պուտինն անդրադարձել է ռուս-ուկրաինական պատերազմի հարցով ԱՄՆ-ի հետ բանակցություններին։ Նա ասել է, որ Ռուսաստանն ընդհանուր առմամբ համաձայն է, որ Ուկրաինայի վերաբերյալ ԱՄՆ կետերի ցանկը կարող է հիմք հանդիսանալ ապագա համաձայնագրերի համար»։ Ինչպե՞ս կմեկնաբանեք ՌԴ նախագահի երեկվա ելույթը։
- Դիվանագիտությունը բաց թողնելու, խաղաղության առաջարկը չմերժելու պահվածք է դրսևորում ՌԴ-ն։ Սա չի նշանակում, որ ամեն ինչ հեզասահ գնում է։ Չեմ կարծում, որ բեկումնային պահի նախաշեմին ենք։ Ընդամենը միջնորդավորված բանակցությունների նախապատրաստություն։
- Ինչպես կմեկնաբանեք ՌԴ նախագահի հայտարարությունը, թե «Ռուսաստանը տեսնում է, որ ԱՄՆ-ն ընդհանուր առմամբ հաշվի է առնում իր դիրքորոշումը։ Ուկրաինայի հարցով խաղաղության ծրագրի յուրաքանչյուր բառ պետք է լուրջ քննարկվի»։
- Դեկլարատիվ բնույթի հայտարարություններ։ Ընդհանուր առանցք բանակցային առումով դեռևս չկա։ Կա հանգույց՝ մի կողմից անվտանգության երաշխիքներ, մյուս կողմից տարածքների ճակատագրի ճշտման մեխանիզմներ։ Բարդ հանգույց է, իսկ հանգուցալուծումը մոտ չի թվում։
- Ռուս-ամերիկյան բանակցությունների ընթացքն ինչպես կգնահատեք։ Սպասվում են նոր հանդիպումներ, և կարելի է ասել, որ հաջողությունը մոտ է։
- Հանդիպումներ չեն բացառվում։ Կլինեն տեքստեր, վերախմբագրումներ, առարկություններ և հակաառաջարկներ։ Հատուկ ձևաչափերով, տարբեր միջավայրերում կլինեն հանդիպումներ։ Ներկա ընթացքը սրանով է պատկերվելու։
- Մինչ այդ եղան նաև մամուլում ՌԴ նախագահի ու ԱՄՆ նախագահի օգնականների զրույցի արտահոսքեր։ Ինչ նպատակով սա արվեց, և ինչ հետևանքներ կունենա։
- Նման մակարդակների վրա տեղեկատվության արտահոսքերը պատահական չեն լինում։ Արտահոսքերը ոչ միայն հանրային կարծիքի ձևավորման նպատակ ունեն, այլև ուղերձների և ճնշամիջոցների համադրություն։ Նման արտահոսքերը երկկողմանիորեն խոսում են այն մասին, որ դեռևս չկա համաձայնեցված ընդհանուր առանցք։ Արտահոսքային բանակցություններ են գնում։
Արման Գալոյան
