Սահմանադրական բարեփոխումների խորհրդում մինչ այժմ անկախության հռչակագրի հետ կապված որևէ քննարկում չի եղել. Radar Armenia-ի հետ հարցազրույցում հայտնեց խորհրդի անդամ Դանիել Իոաննիսյանը՝ հավանական համարելով, որ հարցն առաջիկայում կքննարկվի։
- Ի՞նչ փուլում են սահմանադրական հանձնաժողովի աշխատանքները
- Սահմանադրական բարեփոխումների խորհուրդը վերջին նիստը գումարել է անցյալ տարվա սեպտեմբերին։ Միաժամանակ, սահմանադրական բարեփոխումների աշխատանքում մի քիչ փոփոխություն է տեղի եղել։ Հիմա արդարադատության նախարարությունը պատրաստում է առաջարկություններ, որոնք արդեն բաժին-բաժին կքննարկվեն խորհրդում, այնուհետ նաև՝ հանրության շրջանում։
- Վարչապետը նշեց, որ, իր կարծիքով, անկախության հռչակագիրը սահմանադրությունից պետք է հանել։ Նման հարց հանձնաժողովը մինչ այս քննարկե՞լ է։
- Խորհրդում անկախության հռչակագրի հետ կապված որևէ քննարկում չի եղել, բայց, կարծում եմ, կլինի։ Հաշվի առնելով նաև հրապարակային ելույթները՝ հավանաբար դա քննարկման առարկա կդառնա։
- Սերժ Սարգսյանը վերջերս կարծիք է հայտնել, որ հարցը հանրաքվեի չի հասնի, և իշխանությունները չեն կարողանա անկախության հռչակագիրը հանել սահմանադրությունից։ Ըստ Ձեզ՝ հանրությունը պատրա՞ստ է այս փոփոխությանը։
- Նախ, դեռ որոշված չէ, որ հանվում է, երկրորդը՝ կքննարկենք․ եթե հանրությունը դեմ լինի, չի ընդունվի։ Հո Սերժ Սարգսյանի ժամանակնե՞րը չեն, որ հանրաքվե կեղծվի։
- Ընդդիմությունն ի՞նչ միջոցներ ունի՝ կանխելու դա։
- Բայց ինչո՞ւ են ուզում՝ հանրաքվե չլինի։ Ինձ համար շատ տարօրինակ է, երբ ինչ-որ մեկն ասում է՝ չեմ ուզում՝ հանրաքվե լինի։ Հանրաքվեի ժամանակ ժողովուրդը կորոշի՝ ուզում է, թե ոչ։ Կարո՞ղ է՝ կասկածում են, որ ժողովուրդը մի բան է ուզում, իրենք՝ ուրիշ բան։ Իմ կարծիքով՝ նոր սահմանադրության կարիքը կա։ Կարիք կա, որ, ի վերջո, ժողովուրդն ընդունի նոր սահմանադրություն, ընդունի՝ առանց կեղծիքների։
Անժելա Պողոսյան
