Հարցազրույց
«Հնարավոր է՝ Վրաստանի ընտրությունների արդյունքները Հայաստանում թեժացնեն մրցապայքարը». Գանտահարյան
Radar Armenia-ի զրուցակիցը միջազգայնագետ Շահան Գանտահարյանն է
- Ինչպե՞ս եք գնահատում Վրաստանում տիրող իրավիճակը խորհրդարանական ընտրություններից առաջ, ի՞նչ կանխատեսումներ ունեք ընտրությունների արդյունքների վերաբերյալ։
- Դժվար է հստակ կանխատեսումներ անելը, որովհետև առարկայական հարցախույզների տվյալներ չկան։ Տպավորություն է, որ մոտ են մրցակից ուժերը։ Տպավորիչ են զանգվածային հավաքները՝ դեպի ԵՄ ուղին շարունակելու։ Սակայն քվեարկության արդյունքները հանրահավաքների քանակով չեն որոշվում։
- Ձեր կարծիքով՝ եթե Վրաստանի ընդդիմությունը հաղթանակ չտանի, և գործող իշխանությունը շարունակի կառավարել երկիրը, ի՞նչ զարգացումներ կարող են լինել տարածաշրջանում։
- Չեմ կարծում, որ կտրուկ բեկումնային փոփոխություններ կլինեն։ Գեթ որոշ ժամանակի համար կլինի այն իրավիճակը, որն այժմ կա։ Սակայն արդյունքից կախված է այն՝ 3+3-ը լիարժեք կաշխատի՞, թե՞ ոչ։ Եթե անգամ խորհրդարանական մեծամասնությունը վերակայանա, չեմ կարծում, որ Արևմուտքը կհրաժարվի Վրաստանում ազդեցության գոտիներ ձևավորելու մտադրությունից։
- Արդյոք ԵՄ-Հայաստան հարաբերությունների զարգացման համար կարևոր նշանակություն ունի այս ընտրությունները․ եթե այո, ինչու։
- 3+3-ի մասով՝ այո։ Եթե եվրոպամետները շահեն, այդ միտումն, իբրև ընդհանուր գնացք, կարող է ընթանալ դեպի մեզ։ Հակառակ դեպքում, մեր երկրում ավելի սուր մրցապայքարի տեսք կստանա երկու ուղղությունների պայքարը։
- Դեպի ԵՄ ու վիզայի ազատականացման ճանապարհին որքանո՞վ է խոչընդոտ Հայաստանի՝ ԵԱՏՄ, ՀԱՊԿ անդամ լինելու հանգամանքը։
- Փաստորեն, վիզաների ազատականացման գործընթացն սկսել է՝ առանց ՀԱՊԿ-ից դուրս գալը, որպես նախապայման, առաջ քաշելու։ Չմոռանանք, որ մեր անդամակցությունը դե ֆակտո սառեցվել է այդ կառույցին։ Այս խնդիրը կարելի է ավելի հստակ դիտարկել Վրաստանի ընտրությունների արդյունքների՝ Հայաստանում գրանցվելիք ազդեցությունների շրջանակներում։
Հայկ Մագոյան
