ԱՄՆ-ի բորսաներում բաժնետոմսերի գներն ու դոլարի փոխարժեքը կրկին զգալիորեն նվազել են։ Վերլուծաբաններն ու լրատվամիջոցները դա կապում են նախագահ Դոնալդ Թրամփի՝ ԱՄՆ Դաշնային պահուստային համակարգի նախագահ Ջերոմ Փաուելին ուղղված հերթական գրառման հետ, որտեղ Թրամփը նրան անվանել է «լիակատար ձախողակ»։
Թրամփը սոցիալական ցանցում կոպիտ արտահայտություններով կոչ է արել Փաուելին՝ «կանխարգելիչ նպատակով» նվազեցնել Դաշնային պահուստային համակարգի տոկոսադրույքները՝ վարկերն ավելի մատչելի դարձնելու նպատակով։ Ըստ նրա՝ այս քայլը կարող է խթանել տնտեսական աճը։ «Տնտեսությունն ունի դանդաղելու վտանգ, եթե 'Չափազանց ուշ արձագանքող' պարոն Ձախողակը անհապաղ չիջեցնի տոկոսադրույքները», – գրել է Թրամփը՝ վերահաստատելով իր կոչը, որն արդեն մի քանի անգամ հնչեցրել է։
ԱՄՆ-ում Դաշնային պահուստային համակարգը կատարում է կենտրոնական բանկի գործառույթներ։
Թրամփի՝ ներմուծման մաքսատուրքերի վերաբերյալ որոշումներն արդեն իսկ հանգեցրել են բորսաների անկմանը, իսկ Փաուելի հետ նրա հակասությունները խորացնում են շուկայում տիրող անորոշությունն ու լարվածությունը։
S&P 500 ինդեքսը, որը հաշվարկվում է ԱՄՆ-ի 500 խոշորագույն ընկերությունների բաժնետոմսերի գների հիման վրա, երկուշաբթի նվազել է մոտ 2.4%-ով։ Տարեսկզբից այն կորցրել է շուրջ 12%։
Dow Jones ինդեքսը նույն օրը նվազել է 2.5%-ով, իսկ տարեսկզբից՝ մոտ 10%։
Nasdaq ինդեքսը, որը ներառում է ԱՄՆ-ի բարձր տեխնոլոգիական ընկերությունների բաժնետոմսերը, երկուշաբթի նվազել է ավելի քան 2.5%-ով, իսկ տարեսկզբից այդ ընկերությունները միջինում կորցրել են իրենց արժեքի շուրջ 18%-ը։
