Ֆինանսներ
«Standard & Poor’s»-ը վերահաստատել է Հայաստանի սուվերեն «BB-» վարկանիշը կայուն հեռանկարով
Օգոստոսի 23-ին «Standard & Poor’s» վարկանիշային գործակալությունը վերահաստատել է Հայաստանի Հանրապետության՝ արտարժույթով և ազգային արժույթով երկարաժամկետ/կարճաժամկետ պարտավորությունների թողարկման սուվերեն «BB-»/«B» վարկանիշը` անփոփոխ թողնելով նաև «կայուն» հեռանկարը:
Վարկանիշի վերահաստատման հիմքում ընկած են եղել երկրի տնտեսական աճի կայուն հեռանկարները, կառավարության պարտքի կառավարելի մակարդակն ու արտաքին ֆինանսներին հասանելիությունը, ինչպես նաև ՀՀ կառավարության և կենտրոնական բանկի կողմից վարվող ողջամիտ մակրոտնտեսական քաղաքականությունը, որի շնորհիվ պահպանվել է մակրոտնտեսական և ֆինանսական կայունությունն արտաքին մի շարք ցնցումների պարագայում: Դրանց զուգահեռ գործակալության կողմից առանձնացվել են վճարային հաշվեկշռի առկա խոցելիությունն ու աշխարհաքաղաքական ռիսկերը, մասնավորապես՝ պայմանավորված Հայաստանի ու Ադրբեջանի միջև սահմանազատման գործընթացի ու խաղաղության պայմանագրի շուրջ բանակցությունների ընթացքով:
Գործակալության կողմից պահպանվել է նաև ընթացիկ տարվա տնտեսական աճի կանխատեսումը՝ 6.2%, որի հիմքում ընկած կլինի սպառման բարձր մակարդակը՝ պայմանավորված զբոսաշրջության ոլորտի ընդլայնմամբ, իրական աշխատավարձի աճով և բարձր պետական ծախսերով: Ինչ վերաբերում է միջնաժամկետ հեռանկարներին, ակնկալվում է, որ մինչև 2027թ. տնտեսությունը տարեկան կաճի միջինում 5%-ով:
