Նեպալը որոշել է չեղարկել Էվերեստ բարձրացողներից գանձվող 4,000 դոլար ավանդի համակարգը, որը պետք է վերադարձվեր միայն այն դեպքում, եթե նրանք ներքև բերեին առնվազն 8 կգ աղբ։ Իշխանությունների խոսքով՝ ծրագիրը 11 տարվա ընթացքում արդյունք չի տվել, իսկ Էվերեստում աղբը շարունակում է կուտակվել՝ հասնելով մոտ 50 տոննայի։
Պարզվել է, որ ալպինիստները հիմնականում աղբը բերում էին ստորին ճամբարներից, մինչդեռ ամենալուրջ խնդիրը վերին հատվածներում է, որտեղ թողնվում են վրաններ, դատարկ տարաներ ու սննդի փաթեթներ։ Բացի այդ, վերահսկողության պակասը լուրջ խոչընդոտ է եղել։
Նոր կանոններով նախատեսվում է ներդնել ոչ վերադարձվող 4,000 դոլար մաքրման վճար, որը կուղղվի վերահսկողության ուժեղացմանն ու մաքրման աշխատանքներին։ Նպատակն է վերջապես լուծել Էվերեստի աղբի խնդիրը, որը սրվում է տարեցտարի աճող ալպինիստների թվի պատճառով։
