Ամերիկացի դերասան Քևին Սփեյսիի դեմ սեռական ոտնձգության նոր մեղադրանքներ կան․ դերասանի դեմ նոր դատավարությունը կսկսվի Լոնդոնում՝ 2026 թվականի հոկտեմբերին, հաղորդում է BBC-ն։
Երեք տղամարդ Սփեյսիին մեղադրել են սեռական ոտնձգության մեջ, որը, ենթադրաբար, տեղի է ունեցել 2000-2013 թվականների միջև ընկած ժամանակահատվածում։ Դերասանը հերքում է բոլոր մեղադրանքները։
Հայցվորներից մեկի խոսքով, որի անունը չի հրապարակվում, Սփեյսին, ենթադրաբար, 2000-2005 թվականների միջև ընկած ժամանակահատվածում մոտ 12 անգամ իր նկատմամբ ոտնձգություն է կատարել։ Մեկ այլ հայցվոր պնդում է, որ Սփեյսին, որի հետ նա աշխատել է Լոնդոնի Օլդ Վիկ թատրոնում, սեռական ոտնձգություն է կատարել իր դեմ 2008 թվականին՝ պատճառելով իրեն «հոգեկան տրավմա և ֆինանսական կորուստ»։ Նա հայցը ներկայացրել է դեռևս 2022 թվականին, սակայն գործը կասեցվել է մինչև դերասանի քրեական դատավարությունը։
Երրորդ հայցվորը՝ դերասան Ռուարի Քեննոնը, հրաժարվել է անանունության իրավունքից և բացահայտորեն մեղադրել է Սփեյսիին երեկույթի ժամանակ իրեն ոտնձգելու մեջ։
2023 թվականի հուլիսին Լոնդոնի Սազերլենդի թագավորական դատարանի ժյուրին Սփեյսիին անմեղ էր ճանաչել 2004-2013 թվականներին չորս տղամարդկանց նկատմամբ սեռական ոտնձգության և անպարկեշտ վարքի բոլոր ինը մեղադրանքներով։ Այդ ժամանակ դերասանը շեշտել էր, որ հայցվորները մեղադրանքները ներկայացրել էին իր դեմ միայն ֆինանսական փոխհատուցում ստանալու համար։
