Դարեր շարունակ համարվել է, որ բորոտությունը՝ Հանսենի հիվանդությունը, Ամերիկա է բերվել եվրոպացի գաղութարարների կամ ստրկացված աֆրիկացիների կողմից: Սակայն Science ամսագրում հրապարակված հետազոտությունը հերքում է այդ ենթադրությունը: Միջազգային հետազոտողների խմբի տվյալներով՝ Mycobacterium lepromatosis քիչ հայտնի բակտերիայի տեսակը Ամերիկայի տարածքում գոյություն է ունեցել առնվազն 1000 տարի առաջ՝ եվրոպացիների հետ շփումից առաջ, ինչը փոխում է այդ հիվանդության գլոբալ պատմության պատկերացումները:
Հետազոտությունը վերլուծել է Հյուսիսային և Հարավային Ամերիկայից ստացված մոտ 800 հին և ժամանակակից ԴՆԹ նմուշներ: Գիտնականները հայտնաբերել են M. lepromatosis-ը մարդկային մնացորդներում, որոնք գտնվել են միմյանցից հեռու վայրերում:
M. lepromatosis բակտերիան առաջին անգամ բացահայտվել է 2008 թվականին՝ դոկտոր Սյան-Յան Հանի և նրա գործընկերների կողմից Տեխասի համալսարանի Մ. Դ. Անդերսոնի անվան ուռուցքաբանական կենտրոնում՝ Մեքսիկայից երկու հիվանդների մոտ այն հայտնաբերելուց հետո: Այդ ժամանակից ի վեր հիվանդության դեպքերը գրանցվել են ամբողջ Ամերիկայում, իսկ առանձին դեպքեր՝ Ասիայում և Մեծ Բրիտանիայում: Հնարավոր է՝ ամենաառեղծվածային հայտնագործություններից մեկը կատարվել է 2016 թվականին, երբ անասնաբույժները M. lepromatosis-ը հայտնաբերել են Մեծ Բրիտանիայի կղզիներում՝ կարմիր սկյուռների մոտ: Գենետիկ հետազոտությունները ցույց են տալիս, որ այդ շտամը, հավանաբար, ծագել է Ամերիկայում և կարող էր Եվրոպա տեղափոխվել XIX դարում:
