Գիտնականները ենթադրում են, որ տիեզերքի ամենահանելուկային երևույթը՝ մութ նյութը, գուցե այնքան էլ «մութ» չէ, որքան կարծում են։ Նոր ուսումնասիրությունը ենթադրում է, որ այն կարող է թողնել գրեթե անտեսանելի կարմրավուն կամ կապտավուն երանգներ լույսի վրա, երբ այն անցնում է մութ նյութով հարուստ տարածություններով։
Մութ նյութը կազմում է տիեզերքի նյութի ավելի քան 80%–ը։ Այն չի արձակում, չի կլանում և չի արտացոլում լույսը, ինչի պատճառով էլ ուղղակիորեն դիտարկելը մինչ այժմ հնարավոր չէ։ Սակայն Բրիտանիայի Յորքի համալսարանի գիտնականների նոր տեսական հետազոտությունը ցույց է տալիս, որ լույսը, անցնելով մութ նյութով հագեցած տիեզերական հատվածներով, կարող է ստանալ թեթև գունային շեղում՝ կախված մութ նյութի տեսակից։
Գիտնականների հաշվարկներով՝ այս ազդեցությունը չափազանց թույլ է ժամանակակից աստղադիտակներով ֆիքսելու համար, բայց հնարավոր է՝ ապագա սուպեր-զգայուն աստղադիտակները կարողանան այն արձանագրել։ Եթե այս երևույթը ապագայում հաստատվի, այն կբացի տիեզերքի ուսումնասիրության բոլորովին նոր պատուհան՝ գիտնականներին օգնելով վերջապես բացահայտել մութ նյութի իրական բնույթը։
