Գիտնականները մոտ են աստղաֆիզիկոսներին գրեթե կես դար անհանգստացնող առեղծվածի լուծմանը. նոր ուսումնասիրության համաձայն՝ Արեգակի մոլեգին բռնկումների ժամանակ մասնիկները տաքանում են անսպասելի բարձր աստիճանի՝ մինչև մոտ 108 միլիոն Ֆարենհայթ (մոտ 60 միլիոն Ցելսիուս), ինչը վեց անգամ գերազանցում է նախորդ կանխատեսումները։
Արեգակի բռնկումները հսկայական պայթյուններ են, որոնք առաջանում են աստղի մթնոլորտում՝ դուրս նետելով հզոր ճառագայթներ։ Դրանք կարող են խափանել արբանյակների աշխատանքը, խանգարել ռադիոազդանշանների փոխանցմանը և վտանգ ներկայացնել տիեզերագնացների համար։
Էնդրյուսի համալսարանի գիտնական Ալեքսանդեր Ռասելի գլխավորած թիմը պարզել է, որ բռնկումների ընթացքում Արեգակի մթնոլորտում իոնները կարող են տաքանալ մինչև 60 միլիոն Ցելսիուս, մինչդեռ էլեկտրոնների ջերմաստիճանը հասնում է ընդամենը 10–15 միլիոնի։ Քանի որ դրանց ջերմաստիճանները հավասարեցվելու համար ժամանակ է պահանջվում, առաջանում է այսպես կոչված «ջերմային բաց», որը պայմանավորում է բռնկումների յուրահատուկ վարքագիծը։
Այս բացահայտումը կարևոր է նաև գործնական տեսանկյունից։ Եթե գիտնականները մինչ այժմ թերագնահատել են Արեգակի բռնկումների էներգիան, ապա անհրաժեշտ կլինի վերանայել տիեզերական եղանակի կանխատեսումները։ Դա հնարավորություն կտա արբանյակների օպերատորներին, ավիաընկերություններին և տիեզերական գործակալություններին ավելի արդյունավետ պատրաստվել վտանգավոր արեգակնային փոթորիկներին։
