Իր արևոտ լողափերով հայտնի Կիպրոսը զբոսաշրջիկների սիրելի ուղղություններից է։
Երևանից ընդամենը 2.5 ժամ տևող թռիչքից հետո կղզին առաջարկում է հիշարժան հանգիստ։
2025թ. հունվար-հունիսին Կիպրոս է ժամանել մոտ 1 մլն 843 հզ. զբոսաշրջիկ, ինչը գրեթե 11.5%-ով ավել է 2024-ի նույն ժամանակահատվածի համեմատ։
Կիպրոսում հայտնի լողափերից են Պաֆոսը և Կորալ Բեյը։
Պաֆոսը հայտնի է իր խաղաղ միջավայրով, ավազե լողափերով և հնագիտական հուշարձաններով։ Այնտեղ են հնագիտական պարկը և թագավորների դամբարանները (ՅՈւՆԵՍԿՕ-ի համաշխարհային ժառանգության տարածք՝ իր հայտնի մոզաիկաներով և ժայռափոր դամբարաններով)։ Կորալ Բեյն ունի սպիտակ ավազով լողափ, որը հարմար է արևայրուքի համար։ Պաֆոսի կենդանաբանական այգին (Paphos Zoo) գտնվում է Կորալ Բեյում և եզակի է Կիպրոսում, քանի որ այստեղ է գտնվում Եվրոպայի երրորդ ամենամեծ թռչունների հավաքածուն։
Հայտնի լողափերի շարքին են դասվում նաև Այիա Նապան և Պրոտարասը (Ayia Napa, Protaras)։ Այիա Նապան ունի 27 լողափ, որոնցից 14-ը արժանացել են «Կապույտ դրոշ» որակավորմանը։ Cyherbia բուսաբանական այգին գտնվում է Այիա Նապայի ճանապարհին, որտեղ ստեղծված է 9 օրգանական բուրավետ բույսերի այգի՝ նվիրված միջերկրածովյան բույսերին, ինչպես, օրինակ, լավանդա, երիցուկ, ռոզմարին, օրգանո։ Այն համարվում է Կիպրոսի միակ «կենդանի լաբիրինթոսը»։
Նիսի և Մակրոնիսոս լողափերը հատկապես հայտնի են մաքուր ջրերով ու ոսկեգույն ավազով։ Պրոտարասը հարմար է ընտանիքի հետ հանգստի համար, իսկ Կիրենիա և Ալագադի լողափերը խորհուրդ են տրվում ավելի հանգիստ միջավայր փնտրողների համար։ Կիրենիայում կան գեղեցիկ լողափեր՝ ինչպիսին է Escape-ը։
Լինելով Կիպրոսում՝ անհնար է չփորձել Commandaria մեղրահամ գինին, որն աշխարհի հնագույններից մեկն է, իսկ խոհանոցը համեմված է հունա-միջերկրածովյան և արաբական խոհանոցի ավանդույթներով, որտեղ հիմք են հանդիսանում «մեզե» տիպի փոքր ուտեստները։
Կիպրոսը իր բազմազանությամբ ու հյուրընկալությամբ այս տարի ևս մնում է զբոսաշրջիկների ընտրության շարքում։
Պատրաստեց՝ Լիլիթ Աբրահամյանը
