Ժամանց
Մեքենան կարծում է, թե վարորդը քնած է․ չինացի վարորդը չի կարողանում վարել մեքենան
Չինաստանի Չժեցզյան նահանգում տղամարդը, Xiaomi SU7 Max էլեկտրամոբիլ գնելուց հետո, բախվել է անսովոր խնդրի. գրում է Sohu-ն։ Առաջադեմ տեխնոլոգիաներով հագեցած մեքենան, որը պետք է հեշտացներ վարորդի կյանքը, իրականում դարձել է անհարմարությունների աղբյուր։
Խնդիրը կապված է արհեստական բանականության հիման վրա գործող համակարգի՝ վարորդի հոգնածությունը որոշող գործառույթի հետ։ Ամեն անգամ, երբ տղամարդը վարում է մեքենան, համակարգը սխալմամբ որոշում է, թե նրա աչքերը փակ են։ Պատճառն այն է, որ վարորդի աչքերն, ըստ համակարգի, չափազանց նեղ են։ Արդյունքում, մեքենան հաճախակի ձայնային ազդանշան է տալիս՝ «Ուշադիր եղեք ղեկին» նախազգուշացմամբ, որն արտացոլվում է նաև էկրանին։ Համակարգն ի զորու չէ տարբերակել, որ վարորդի աչքերն իրականում բաց են։
Տղամարդը փորձել է տեսանյութով ապացուցել իր աչքերի բաց լինելը՝ լայնորեն բացելով դրանք, սակայն նախազգուշացումները շարունակվել են՝ խանգարելով կենտրոնանալ վարելու ժամանակ։
Սոցիալական ցանցերում այլ վարորդներ նույնպես հաստատել են նմանատիպ խնդիրներ ոչ միայն Xiaomi SU7-ում, այլև՝ այլ չինական էլեկտրամոբիլներում՝ Xpeng, Lantu և Nio։ Xiaomi-ի տեխնիկական աջակցությունը բացատրել է, որ համակարգը հոգնածության նշանները բացահայտում է տեսողական ցուցիչների՝ փակ աչքերի, հորանջելու և այլ գործոնների հիման վրա։ Չնայած այդ գործառույթը կարելի է անջատել կարգավորումներում, ընկերությունը խորհուրդ չի տալիս դա անել՝ անվտանգության նկատառումներից ելնելով։
Ներկայումս Xiaomi ընկերությունը դեռևս անհատականացված լուծումներ չի առաջարկել նման դեպքերի համար։ Տեղական լրատվամիջոցները նշում են, որ այս իրավիճակը ընդգծում է արհեստական բանականության տեխնոլոգիաների սահմանափակումները՝ կապված մարդու ռասայական և անհատական առանձնահատկությունների ճանաչման հետ։
Պատրաստեց՝ Ալվարդ Բաղդասարյանը
