Radar Armenia-ն ներկայացնում է 2024թ. լավագույն ֆիլմերը, որոնք մեծ հաջողություն ունեցան 2024թ. համաշխարհային կինոարտադրության մեջ։
Ամանորյա օրերը լավագույն պահն են՝ ազատվելու հոգսերից և վայելելու համաշխարհային մեծ ճանաչում ունեցող ֆիլմերը։
Այդ ցանկում առանձնահատուկ ուշադրության է արժանանում «Այլ մարդը» (A Different Man) ֆիլմը, որը պատմություն է ինքնության և վերափոխման մասին, նաև՝ խորաթափանց հայացք մարդկային ցանկությունների և դրանց հետևանքների վրա։
Արդեն երկար տարիներ երազելով դառնալ հաջողակ դերասան՝ Էդվարդը բախվում է կյանքի ամենամեծ մարտահրավերին. իր արտաքին տեսքի պատճառով նրան անընդհատ մերժում են կինոստուդիաները։
Հուսահատված՝ նա որոշում է դիմել բժշկական միջամտության։ Էդվարդը համաձայնվում է ենթարկվել նորարարական, սակայն ռիսկային վիրահատության, որը լիովին փոխում է նրա դեմքը։
Սկզբում ամեն ինչ հիանալի է թվում, սակայն շուտով Էդվարդը սկսում է նկատել տարօրինակ փոփոխություններ։ Նրա նոր դեմքը, որն ի սկզբանե կատարյալ էր թվում, կարծես ապրում է իր սեփական կյանքով։
Դերասանական կազմում հանդես են գալիս Սեբաստիան Սթենը, Ռենատե Ռայնսվեն, Ադամ Պիրսոն։ «Այլ մարդը» ֆիլմը ոչ միայն պատմություն է ֆիզիկական և հոգեբանական վերափոխման մասին, այլև հիշեցում, որ երբեմն մեր երազանքները կարող են վերածվել ամենամեծ մղձավանջի։
