Հազարավոր մարդիկ են հավաքվել Դուբլինի փողոցներում՝ անհամբեր սպասելով Հելոուինի շքերթին, սակայն քաղաքի կենտրոնում շքերթն այդպես էլ չի կայացել:
Դուբլինի փողոցներ դուրս եկած հատուկ պատրաստված իռլանդացիները խաբվել են Պակիստանում տեղակայված կեղծ կայքից, որը հայտարարել էր փառատոնի մասին։ Լուրը արագորեն տարածվել է համացանցում:
My Spirit Halloween կայքը կեղծ տեղեկություններ է տեղադրել այն մասին, որ Macnas Halloween Parade-ը տեղի կունենա երեկոյան՝ 19։00-21։00-ը, և դրա նկատմամբ հետաքրքրություն է ցուցաբերվել Google-ի նորությունների վարկանիշում:
Հազարավոր մարդիկ շարվել են Պարնել փողոցից դեպի Քրայսթչերչի տաճար տանող երթուղու երկայնքով և որոշ ժամանակ անց հասկացել, որ լուրը կեղծ էր։
«Խնդրում եմ՝ ընդունեք ի գիտություն, որ, ի հեճուկս համացանցում տարածվող տեղեկատվության, Հելոուինի պատվին շքերթ չի նախատեսվում Դուբլինի կենտրոնում»,- նման հաղորդագրություն է տարածել իռլանդական ոստիկանությունը՝ փորձելով ցրել հավաքվածներին:
«Առեղծվածային շքերթի» մասնակիցները հեգնանքով են ընդունել այդ չարաճճի լուրը և համակարծիք են եղել, որ «Դուբլինի քաղաքային խորհուրդը պետք է այն կազմակերպի հաջորդ տարի»:
