ԱՄՆ Ջորջթաունի և Օհայոյի պետական համալսարանների գիտնականները պարզել են, որ էներգետիկ ըմպելիքները, ալկոհոլը, հացը, հյութը և հացահատիկը կարող են լինել «թաքնված» շաքարի աղբյուրներ: Հետազոտության արդյունքները հրապարակվել են Nutrients ամսագրում:
Գիտնականները նշել են, որ սննդակարգում շաքարի ավելցուկը մեծացնում է տարբեր պաթոլոգիաների՝ սիրտ-անոթային հիվանդությունների, շաքարային դիաբետի, քաղցկեղի առաջացման վտանգը։ Այդ իսկ պատճառով Առողջապահության համաշխարհային կազմակերպության մասնագետները խորհուրդ են տալիս սահմանափակել ազատ շաքարի օգտագործումը։ Ավելացված շաքարը պետք է կազմի ձեր ընդհանուր օրական կալորիաների 10%-ից պակաս:
Ամերիկացի հետազոտողների կարծիքով՝ նման հանձնարարականին հետևելը կարող է բավականին դժվար լինել։ Բանն այն է, որ որոշ մթերքներում շաքարի բարձր պարունակությունն ակնհայտ չէ։ Պարզելու համար, թե որ մթերքները կարող են պոտենցիալ վնասակար լինել առողջության համար ավելորդ քանակությամբ, գիտնականները հետազոտություն են անցկացրել 35 հազար մեծահասակների մասնակցությամբ։ Նրանք մասնակիցներին խնդրեցին խոսել իրենց սննդակարգի մասին և կազմել «թաքնված» շաքարով հարուստ հայտնի մթերքների ցանկ։
Պարզվել է, որ ոչ ակնհայտ ավելացված շաքարի պարունակությամբ առաջատարը զովացուցիչ ըմպելիքներն են, ինչպիսիք են էներգետիկ ըմպելիքները և հյութերը։ Գիտնականները նշել են, որ ալկոհոլը, մասնավորապես լիկյորներն ու կոկտեյլները, նույնպես շատ շաքար են պարունակում։ Այս սննդային բաղադրիչը հանդիպում է հացի և խմորեղենի, հացահատիկի, կաթնամթերքի աղանդերի, սերուցքի և որոշ սոուսների մեջ:
Հետազոտության հեղինակները հույս ունեն, որ իրենց աշխատանքի արդյունքները կարող են դրդել մարդկանց ավելի զգույշ և առողջ սննդի ընտրություն կատարել: Հստակ իմանալու համար, թե կոնկրետ արտադրանքը որքան շաքար է պարունակում, գիտնականները խորհուրդ են տվել ուշադիր կարդալ պիտակները:
