Երկուշաբթի, 26 Սեպտեմբերի 2022

USD412.03

EUR399.62

RUB6.58

Երևան 7 ℃

Рус Eng

«Ես վերջապես Հայաստանում եմ. դա իմ երազանքի իրականացումն է». Բրայան Մեյ

Ժամանց

7 Սեպտեմբերի, 11:52

Հայաստանում շարունակվում են «Սթարմուս» միջազգային փառատոնի շրջանակում անցկացվող միջոցառումները, ասուլիսներն ու հանդիպում-դասախոսությունները։

Ասուլիսով են հանդես եկել Սթիվեն Հոքինգի շքանշանի դափնեկիրներ Բրայան Մեյը և Դայան Աքերմանը։ Մեյն անդրադարձել է փառատոնի շրջանակում սեպտեմբերի 7-ին Հայ առաքելական եկեղեցու Տավուշի թեմի մանկապատանեկան երգչախմբի հետ սպասվող ելույթին։ Երաժիշտը հատուկ ընդգծել է, որ երեխաների հետ ելույթները նախևառաջ հույզերի փոխանակում են, ոչ թե կատարողական վարպետության նկատմամբ խիստ մոտեցում։ «Ես չէի ուզում, որ նրանք լարվածություն զգան, և որոշեցի փորձերի ժամանակ նվազագույն փոփոխությունները մտցնել։ Նրանք չպետք է իրենց վրա ճնշում զգան։ Իսկ մենք՝ երաժիշտներս, այս համերգի ժամանակ դուրս ենք գալու մեր հարմարավետության գոտուց, և դա նույնիսկ լավ է։ Մենք կկարողանանք փորձել այն, ինչը երբեք չէինք փորձի այլ բեմերում»,- ասել է Մեյը։ 

Նա նշել է, որ առաջին անգամ է Հայաստանում. «Երկրաշարժից ի վեր շատ մտահոգ եմ եղել Հայաստանի ճակատագրով։ Եղել են շատ դեպքեր, որ այլ երաժիշտների հետ գործակցությամբ ցանկացել եմ գալ Հայաստան: Այս անգամ ես վերջապես Հայաստանում եմ, և, կարելի է ասել, դա իմ երազանքի իրականացումն է»։ Queen խմբի կիթառահարն առանձնակի ջերմությամբ է հիշել Ջիվան Գասպարյանի հետ համատեղ աշխատանքը «Գլադիատոր» ֆիլմի նկարահանումների ձայնագրությունների ժամանակ։

«Սթարմուսի» շրջանակում անցկացվող դասախոսությունների շարքում ԵՊՀ-ն երեկ հյուրընկալել է շվեյցարացի աշխարհահռչակ աստղաֆիզիկոս, Նոբելյան մրցանակակիր Միշել Մայորին։ Ուսանողները եզակի հնարավորություն են ունեցել՝ ունկնդրելու ականավոր գիտնականի դասախոսությունը տիեզերական օբյեկտների, այդ թվում՝ Մայորի հայտնագործության՝ արեգակնանման «51 Pegasi b» էքսոմոլորակի և աստղագիտության հետագա զարգացման գործում դրա ունեցած դերի մասին։

Հայաստանում Ամերիկյան համալսարանը հյուրընկալել է NASA-ի ռեակտիվ շարժիչ լաբորատորիայի համակարգերի ինժեներ Նագին Կոքսին, ով ուսանողների հետ կիսվել է իր հարուստ փորձով։

Ալիխանյանի անվան ազգային լաբորատորիայում էլ տիեզերքում աստղերի, մոլորակների և կյանքի բաղադրիչների ստեղծման թեմայով դասախոսությամբ է հանդես եկել Միջազգային աստղագիտական միության նախկին նախագահ Էվին ֆան Դիշյոքը։ «Ես ահռելի ներուժ տեսա Հայաստանում, հատկապես՝ աստղագիտության ասպարեզում: Բյուրականի աստղադիտարանը երկար տարիներ ահռելի դեր է խաղացել համաշխարհային աստղագիտության մեջ: Ես նաև այլ բան տեսա. «Սթարմուսի» ընթացքում տեսա բազմաթիվ խանդավառ երիտասարդների, և, կարծում եմ, հենց նրանք են Հայաստանի իրական ապագան»,- ասել է գիտնականը։

Դասախոսություններ են անցկացվել նաև Հայաստանի ազգային պոլիտեխնիկական և Ագրարային համալսարաններում, ինչպես նաև «ԹՈՒՄՈ» կենտրոնում։

Փառատոնի շրջանակում Կարեն Դեմիրճյանի անվան մարզահամերգային համալիրում կայացել է նաև «Բացահայտիր տիեզերքը և փոխիր աշխարհը» թեմայով կոնֆերանսը, որին մասնակցել են անվանի գիտնականներ Թոնի Ֆադելը, աշխարհի երրորդ կին Նոբելյան մրցանակակիր Դանա Ստրիքլենդը, Էմանուել Շարպենտիեն, Մաուրին Ռեյմոն, Ժան-Ժակ Դորդենը, Բեռնհարդ Շոլկոպֆը, Կուրտ Վյուտրիխը, Դեյվիդ Զամբուկան։

Արման Գալոյան

Նրանց պետք է իշխանություն, թեկուզ՝ առանց պետության

Գոռ Մադոյան

Հավանական դաշնակցին սպասելիս կամ «զենքս գաղտնի թող մնա»