Տավուշի մարզում իրականացվում են մի շարք հավակնոտ ծրագրեր, որոնք միտված են մարզում սոցիալական կայունության ապահովմանը։ Այն իրականացվում է Եվրոպական միության աջակցությամբ՝ «Սոցիալական ձեռներեցության էկոհամակարգի զարգացում սահմանամերձ շրջաններում կանաչ առաջընթացի համար» ծրագրի շրջանակներում։ Ծրագիրը Հայաստանում իրականացնում է «Կանաչ արահետ» ՀԿ-ն։
Հովքի կանաչ ուսուցման կենտրոնը մեծ հնարավորություն է գյուղական զբոսաշրջության, խելամիտ գյուղատնտեսության վարման և ագրարային կրթության զարգացման համար:
Հովքի կանաչ ուսուցման կենտրոնը գյուղական զբոսաշրջության և բարձրարժեք գյուղատնտեսության համատեղման յուրօրինակ վայր է։ Այն իրենից ներկայացնում է խելամիտ գյուղատնտեսության մոդել, որտեղ գյուղատնտեսությամբ հետաքրքրված մարդիկ կարող են սովորել ինչպես վարել խելացի գյուղատնտեսություն։ Ուսուցման կենտրոնում ներկայացված են տարբեր բարձրարժեք մշակաբույսեր. մարդիկ կարող են գալ, տեղում սովորել մշակման մեթոդները և ծանոթանալ մի շարք բարձրարժեք բույսերի տեսակներին։
2021թ. հոկտեմբերից Տավուշի մարզում գործում է գիտելիքի նորարարական ՀԱԲ-ը։ Գիտելիքի նորարարական ՀԱԲ-ը կրթական-զարգացնող բնույթի հարթակ է, որի գոյությունը միտված է խթանելու երիտասարդների հմտությունների զարգացումը և զբաղվածությունը: ՀԱԲ-ը ունի ֆիլմասերների, կամավորների և ակտիվ երիտասարդների ակումբ: Նմանատիպ ՀԱԲ-եր գործում են Հայաստանի երեք մարզերում՝ Լոռիում, Շիրակում և Տավուշում։
Նման ՀԱԲ-եր գործում են նաև հարևան Վրաստանում։ Դրանք համագործակցության երիտասարդական հարթակներ են, որոնց շրջանակներում երկու երկրների երիտասարդները տարաբնույթ միջոցառումներ են պլանավորում և իրականացնում։
Տավուշի գիտելիքի նորարարական ՀԱԲ-ն ունի արդեն շուրջ 4000 շահառու և շուրջ 20 ակտիվ կամավորներ, որոնք աշխատում են ՀԱԲ-ի կայացման ուղղությամբ։
Տավուշի մարզի սահմանամերձ Նորաշեն գյուղում օրեր առաջ Փայտյանների ընտանիքի ջանքերով բացվել է «Զովակ» գաստրոբակը։ Գաստրոբակում պատրաստում են տավուշյան ավանդական ուտեստներ։ Այստեղ հոգալու են Նորաշեն ժամանած զբոսաշրջիկների զբաղվածության հարցը։ Գաստրոբակին կից գործում է հյուրատուն։ «Զովակ» գաստրոբակի հիմնադիր Գարիկ Փայտյանի խոսքով՝ այս կերպ նպաստելու են սահմանամերձ համայնքում մնալուն, որպեսզի տեղացիները չարտագաղթեն։
