Կահիրեի մերձակայքում շաբաթ օրը կբացվի Մեծ եգիպտական թանգարանը՝ 1 միլիարդ դոլարի արժողությամբ հսկայական համալիր, որը նվիրված է մեկ քաղաքակրթության պատմությանը։ Թանգարանը գտնվում է Գիզայի բուրգերից մեկ կիլոմետր հեռավորության վրա և զբաղեցնում է 470 հազար քառակուսի մետր տարածք։
Նախագծի մասին հայտարարվել էր դեռևս 1992 թվականին, բայց շինարարությունը սկսվել է միայն 2005-ին։ Երկու տասնամյակ տևած շինարարության ընթացքում բացումը բազմիցս հետաձգվել է՝ վերջին անգամ հուլիսին՝ Մերձավոր Արևելքի ընթացիկ հակամարտությունների պատճառով։
Թանգարանում կտեղադրվեն ավելի քան 50,000 ցուցանմուշներ, այդ թվում՝ Ռամզես II-ի 83 տոննա քաշով, 3200 տարեկան կոթողը և 4500 տարեկան նավակը, որը պատկանել է փարավոն Խուֆուին, որին վերագրվում է բուրգերի շինարարությունը։ Շատ առարկաներ տեղափոխվել են Թահրիր հրապարակի հին թանգարանից, որը գործում է շուրջ մեկ դար, մյուսները՝ վերջերս հայտնաբերվել են Սաքքարայի դամբարանից։
Թանգարանը ներառում է 24 հազար քառակուսի մետր ցուցադրական տարածք, երեխաների թանգարան, կոնֆերանս դահլիճներ, առևտրային գոտի և վերականգնման կենտրոն։ 12 հիմնական սրահները, որոնք բացվել են անցյալ տարի, ցուցադրում են ցուցանմուշներ նախապատմական ժամանակներից մինչև հռոմեական դարաշրջան։
Բացման արարողությանը ներկա կլինեն աշխարհի առաջնորդներ և Եգիպտոսի նախագահ Աբդել Ֆաթթահ ալ-Սիսին։ Բուրգերից թանգարան է տանում նոր հետիոտնային ճանապարհ։
Աֆրիկայի երկրորդ խոշորագույն տնտեսությունն ունեցող Եգիպտոսը սպասում է, որ թանգարանը կշարունակի զարգացնել զբոսաշրջությունը։ 2024-ին երկիրը ընդունել է ռեկորդային 15.7 միլիոն այցելու, իսկ կառավարությունը նպատակ ունի 2032 թվականին այդ թիվը կրկնապատկել։ Թանգարանի ադմինիստրատորները ակնկալում են օրական 15-20 հազար այցելու։
