ՀՀ կրթության, գիտության, մշակույթի և սպորտի նախարարության, Վրաստանի մշակույթի նախարարության և Թբիլիսիի քաղաքապետարանի աջակցությամբ Գաբրիել Սունդուկյանի անվան ազգային ակադեմիական թատրոնում կայացել է «Սիրո կամուրջ» խորագրով հիշատակի միջոցառում՝ նվիրված Մհեր Մկրտչյանին և Սոֆիկո Ճիաուրելիին: Հուշ երեկոն կազմակերպվել է Մհեր Մկրտչյանի ծննդյան 95-ամյակի կապակցությամբ, որը լրանում է այսօր՝ հուլիսի 4-ին։
Միջոցառմանը ներկա են եղել ԿԳՄՍ նախարարի տեղակալ Արթուր Մարտիրոսյանը, հայ և վրացի պաշտոնյաներ, մշակույթի գործիչներ, արվեստասերներ։ Բացառիկ վիդեոկոլաժների, նշանակալի դրվագների և երաժշտական համարների միջոցով հիշատակի երեկոն հուզիչ ու խորհրդանշական ուղևորություն էր դեպի հայ-վրացական թատրոնի և կինոյի անցած ուղի՝ վկայելով երկու ժողովուրդների միջև ձևավորված խոր արմատներ ունեցող մշակութային կապերի մասին։
Միջոցառմանը հանդես են եկել հայ մեծանուն կոմպոզիտոր, ՀԽՍՀ ժողովրդական արտիստ Տիգրան Մանսուրյանը, Վրաստանի և Ռուսաստանի ժողովրդական արտիստ Թամարա Գվերձիթելին, վրացական հայտնի «Թատերական քառյակը» և Դավիթ Մազանաշվիլու երաժշտախումբը, ինչպես նաև Գաբրիել Սունդուկյանի անվան ազգային ակադեմիական և Թբիլիսիի Պետրոս Ադամյանի անվան հայկական պետական դրամատիկական թատրոնների դերասանները։ Երեկոն վարել են Արաքսյա Մելիքյանը (Հայաստան) և Նիկոլոզ Ծուլուկիձեն (Վրաստան):
Միջոցառումն իրականացվում է հայ-վրացական մշակութային համագործակցության շրջանակում և նվիրված է Մհեր Մկրտչյանի ծննդյան 95-ամյակին։ Միջոցառման կազմակերպիչներն են՝ Հայաստանի կինոյի հիմնադրամը, NNLE “Art Air” կազմակերպությունը (Վրաստան) և Գաբրիել Սունդուկյանի անվան ազգային ակադեմիական թատրոնը:
