Եթե ցանկանում եք գարնանային երեկոները լցնել սիրով, ջերմությամբ և խնդությամբ, ապա այս վառ, զգացմունքային, բայց նաև՝ արկածային ռոմանտիկ կատակերգությունները պարտադիր են դիտման համար: Տարվա սկզբին Ջենիֆեր Լոպեսը ուրախացրեց իր երկրպագուներին՝ թողարկելով իր նոր ֆիլմը՝ «Ամուսնացիր ինձ հետ» («Marry me»): Այս ֆիլմում Լոպեսի խաղընկերը ռոմկոմերի հայտնի դերասան Օուեն Ուիլսոնն է, ինչն արդեն խոստումնալից է թվում: Փոփ-աստղը, որին մարմնավորում է Լոպեսը, համերգի ժամանակ ամուսնանում է հանդիսատեսից մեկի հետ, երբ պարզում է, որ իր նշանածն իրեն դավաճանում է:
Մյուս ռոմանտիկ կատակերգությունը կստիպի ձեզ՝ թե՛ հուզական ապրումներ ունենալ, թե՛ մի լավ ծիծաղել հերոսների յուրատեսակ կատակների վրա: «Սիրո գիրքը» («Book of love») ֆիլմը պատմում է ամոթխած, փոքր-ինչ նյարդային բրիտանացի գրողի մասին, ով սիրահարվում է իր գրքի թարգմանչուհուն, որը, գիրքը թարգմանելիս, փոփոխություներ է կատարել՝ դարձնելով այն ավելի կրքոտ և էրոտիկ գիրք:
«Լուսնից պատկեր» («Moonshot») ֆիլմը HBO-ի կողմից այս տարի թողարկված ռոմանտիկ կատակերգություններից է: Ֆիլմի գլխավոր հերոսներին մարմնավորում են Կոլ Սփրուսը՝ «Ռիվերդեյլ» հեռուստասերիալից, և NETFLIX-ի ռոմանտիկ կատակերգությունների աստղ Լանա Կոնդորը: Ֆիլմը կարելի է դասվել նաև գիտաֆանտաստիկ ժանրին: Ֆիլմում Ուոլտ անունով մի բարիստա թաքնվում է տիեզերանավում և հայտնվում գաղութացված Մարսի վրա։ Նա ընկերանում է Սոֆիի հետ, որը քոլեջի խենթ ուսանող է, և գնում է Մարս՝ տեսնելու իր ընկերոջը, ու դրա համար պետք է, առանց բռնվելու, հասնի կարմիր մոլորակ։
Եթե հասցրել էիք կարոտել Սանդրա Բուլոքին, ապա կարող ենք ձեզ ուրախացնել՝ այս տարի էկրաններ բարձրացավ նրա մասնակցությամբ նոր ֆիլմը՝ «Կորսված քաղաք» անունով («The Lost City»): Այն նշանավորում է նաև Չանինգ Տատումի վերադարձը ռոմանտիկ կատակերգության ժանր: Ֆիլմը պատմում է սիրավեպերի հեղինակի մասին, որը էքսցենտրիկ միլիարդատիրոջ հետ հայտնվում է մի կղզում: Միլիարդատերը ցանկանում է, որ սիրավեպերի կին հեղինակը գտնի այն գանձերը, որոնց մասին նա գրել է իր վերջին գրքում: Ֆիլմում խաղում են նաև հայտնի դերասաններ Բրեդ Փիթն ու Դենիել Ռեդքլիֆը:
