ԱԺ «Պատիվ ունեմ» խմբակցության ղեկավար Արթուր Վանեցյանն «ԱԺ կանոնակարգ» սահմանադրական օրենքի վերաբերյալ խորհրդարանական լսումների ժամանակ անդրադարձել է Հայաստանի հետ հարաբերությունները կարգավորելու համար Ադրբեջանի առաջ քաշած 5 սկզբունքներին։ Նշենք, որ ԱԺ կանոնակարգ սահմանադրական օրենքով առաջարկվում է, որ արտգործնախարարը և վարչապետը պետության արտաքին քաղաքականության, բանակցային ուղղություններում կատարված աշխատանքի, անվտանգության հարցերի վերաբերյալ որոշակի պարբերականությամբ զեկույցներ ներկայացնեն խորհրդարան:
Ըստ նրա` այդ սկզբունքներն Արցախից հրաժարվելու, Արցախի հարցը վերջանական փակելու մասին են. «Հայաստանը և Արցախը այսօր կանգնած են անվտանգային լրջագույն մարտահրավերների առաջ: 2020 թվականի սեպտեմբերին Ադրբեջանի սանձազերծած ագրեսիայից հետո Ադրբեջանը խաղաղության համար նոր պահանջներ է առաջ քաշում՝ այսպես կոչված 5 սկզբունքներ ներկայացնելով: Այն, թե ինչի մասին են սկզբունքները, վստահ եմ, որ բոլորդ ծանոթ եք, իմ համոզմամբ դրանք Արցախից հրաժարվելու, Արցախի հարցը վերջանական փակելու մասին են: Միաժամանակ չենք կարող ուշադրություն չդարձնել այն միջավայրին, որի ներքո Ադրբեջանի կողմից ձևակերպվում են այս պահանջները` սահմանամերձ գյուղերի մեր հայրենակիցների հոգեբանական ահաբեկում, հումանիտար աղետ Արցախում, սահմանային լարվածության աճ, հրադադարի ռեժիմի պարբերաբար խախտումներ ու տարբեր տրամաչափի զինատեսակների կիրառում հայկական բնակավայրերի ու դիրքերի ուղղությամբ: Սա դասական իմաստով հարկադրանքի քաղաքականություն է, զինանոցում առկա գրեթե բոլոր տարբերակների օգտագործմամբ»։
«Պատիվ ունեմ» խմբակցության ղեկավարի խոսքով` Բաքվի կողմից իրականացվող այս հարկադրանքի քաղաքականությանը սահուն կերպով միացել է և աջակցում է նաև Թուրքիան։
