ԱԺ «Հայաստան» խմբակցության ղեկավար Սեյրան Օհանյանը, անդրադառնալով նախօրեին ՔՊ խմբակցության պատգամավոր Բաբկեն Թունյանի հարցադրմանը, թե ինչ կանեին, եթե գային իշխանության, նշել է՝ ընդդիմությունը քննադատում է իշխանությանը, իսկ իշխանությունը՝ անցյալը։
Ըստ Օհանյանի՝ իրավիճակից բխող և համակարգված քայլեր պետք է ձեռնարկվեն, և այդ հաջորդականությունից է կախված, թե ինչպիսին կարող է լինել անվտանգությունը․ «Այն, ինչ կատարվել և կատարվում է սահմաններում, հետևանք է այն զիջողական քաղաքականության, որն սկսվել է Կուբաթլուի տարածաշրջանից, Գորիս-Կապան ճանապարհի հանձնումով, Սև լճերում, Իշխանասարի, Ջերմուկի, Գեղարքունիքի հատվածներում և այլն։ Եվ դրա շարունակությունը արտահայտվում է նաև Տավուշում»։
Պաշտպանության նախկին նախարարը նշել է, որ ազգային անվտանգության ռազմավարությունը և նաև ռազմական դոկտրինը, որը նոր պահանջներ ունի, շարունակում է մնալ նույնը. «Մենք լինեինք, ես լինեի, այդ աշխատանքը կիրականացնեի, որպեսզի մենք մեր գործունեությամբ՝ թե ազգային, թե միջազգային երաշխիքների ձևավորման մեջ, հենվեինք միայն ու միայն մեր այդ կարևոր փաստաթղթերի վրա»։