Վենեսուելան պահանջել է, որ Միացյալ Նահանգները հարգի իր օդային տարածքը և կոչ է արել ՄԱԿ-ին և Միջազգային քաղաքացիական ավիացիայի կազմակերպությանը (ICAO) դատապարտել Վաշինգտոնի հայտարարությունը, որը, ըստ Կարակասի, ուժի կիրառման սպառնալիք է, ասվում է կառավարության հաղորդագրության մեջ։
«Վենեսուելան պահանջում է խիստ հարգանք իր օդային տարածքի նկատմամբ, որը պաշտպանված է Միջազգային քաղաքացիական ավիացիայի կազմակերպության (ICAO) կանոններով և հաստատված է 1944 թվականի Չիկագոյի կոնվենցիայով»,- նշվում է փաստաթղթում։
Հանրապետության իշխանությունները վճռականորեն մերժել են ԱՄՆ նախագահի կողմից այսօր սոցիալական ցանցերում տարածված հրապարակային հայտարարությունը, որում «նա փորձում է արտատարածքային կերպով կիրառել ԱՄՆ-ի անօրինական իրավասությունը Վենեսուելայի նկատմամբ՝ փորձելով հրամաններ արձակել և սպառնալ ազգային օդային տարածքի ինքնիշխանությանը, տարածքային ամբողջականությանը, ավիացիոն անվտանգությանը և Վենեսուելայի պետության լիակատար ինքնիշխանությանը»։
«Վենեսուելան հայտարարում է աշխարհին, որ նման հայտարարությունները ներկայացնում են ուժի կիրառման հստակ սպառնալիք, որը հստակորեն արգելված է ՄԱԿ-ի կանոնադրության 2-րդ հոդվածի 4-րդ կետով»,- հայտարարել է Վենեսուելայի կառավարությունը։
Կարասակը կոչ է արել միջազգային հանրությանը, ինքնիշխան կառավարություններին, ՄԱԿ-ին և բազմակողմ մարմիններին վճռականորեն մերժել այս «ագրեսիայի ակտը»։
«Վենեսուելան կարձագանքի արժանապատվորեն, օրինականությամբ և միջազգային իրավունքի և մեր ժողովրդի հակաիմպերիալիստական ոգու կողմից տրված ողջ ուժով։ Վենեսուելան կշարունակի լիովին իրականացնել իր ինքնիշխանությունը, որը պաշտպանված է միջազգային իրավունքով, իր ամբողջ օդային տարածքում»,- ասվում է հաղորդագրության մեջ։
