Հաջորդ տարի Ռուսաստանում ուժի մեջ կմտնի ռուսական ավանդական հոգևոր և բարոյական արժեքները վարկաբեկող ֆիլմերն արգելող օրենքը, հաղորդում է ՌԻԱ Նովոստին՝ հղում անելով Պետդումայի մշակույթի հարցերով հանձնաժողովի ղեկավար Օլգա Կազակովային։
«2026 թվականի մարտի 1-ին ուժի մեջ կմտնի օրենք, որը պարտավորեցնում է առցանց կինոթատրոնների սեփականատերերին կանխել այն աուդիովիզուալ ստեղծագործությունների տարածումը, որոնք վարկաբեկում կամ խթանում են ռուսական ավանդական հոգևոր և բարոյական արժեքների ժխտումը», - ընդգծել է Կազակովան։
Պատգամավորը պարզաբանել է, որ եթե Մշակույթի նախարարությունը որոշի մերժել կամ չեղյալ համարել ֆիլմի տարածման վկայականը, Ռոսկոմնադզորը առցանց կինոթատրոնների սեփականատերերին կուղարկի հարցում՝ 24 ժամվա ընթացքում դադարեցնելու տվյալ ֆիլմի տարածումը։ Այս պահանջը կվերաբերի նաև այն կայքերի կամ սոցիալական ցանցերի էջերի սեփականատերերին, որոնց օրական լսարանը 500,000-ից ավելի մարդ է։
Ֆիլմի պահանջների վերաբերյալ Կազակովան նշել է, որ դրանք «հասկանալի արժեքներ են, որոնք կիսում են մեր բոլոր ժողովուրդները»։ Մանրամասն բացատրության համար պատգամավորը հղում է կատարել Ռուսաստանի նախագահի թիվ 809 հրամանագրին։
