Իսպանիայի վարչապետ Պեդրո Սանչեսը այսօր՝ մայիսի 29-ին, հայտարարել է, որ ցրելու է խորհրդարանը և հուլիսի 23-ին նշանակելու է արտահերթ համընդհանուր ընտրություններ։ «Ես այս որոշումը կայացրել եմ այն բանից հետո, երբ տեսա երեկվա ընտրությունների արդյունքները»,- ասել է Սանչեսը։ Իսպանիայում մայիսի 28-ին կայացած ռեգիոնալ և մունիցիպալ ընտրությունների արդյունքում պահպանողական ժողովրդական կուսակցությունը, որը Իսպանիայի սոցիալիստական աշխատավորական կուսակցության՝ Սանչեսի գլխավոր մրցակիցն է, հաղթել է ինքնավար համայնքների մեծ մասում։
Վարչապետի կուսակցությունը հավաքել է 6,1 միլիոնից մի փոքր ավելի կամ ձայների 28,18%-ը, մինչդեռ պահպանողական ժողովրդական կուսակցության օգտին քվեարկել է ընտրողների մոտ 6,9 միլիոնը կամ 31,47%-ը: Իսպանիայում համընդհանուր ընտրությունները պետք է անցկացվեին 2023 թվականի վերջին։
