Մոսկվա այցի նախօրեին ՌԴ նախագահ Վլադիմիր Պուտինը և Չինաստանի նախագահ Սի Ցզինպինը հոդվածներ են հրապարակել երկկողմ հարաբերությունների մասին։
ՌԴ նախագահի հոդվածում, որը հրապարակվել է չինական «People's Daily» թերթում, նշվում է, որ Մոսկվայի և Պեկինի հարաբերությունները հասել են իրենց պատմության ամենաբարձր մակարդակին։ Սի Ցզինպինը «Российская газета»-ում հրապարակված հոդվածում նշել է, որ Պուտինի հետ միասին նոր գլուխ է բացել երկու երկրների համագործակցության համար։
Ուկրաինայի հարցը
Երկու հոդվածներում էլ հատուկ ուշադրություն է դարձվում Ուկրաինայի թեմային։ Սի Ցզինպինը կրկին խոսել է այն մասին, թե ինչպես է Չինաստանը տեսնում ճգնաժամից դուրս գալու հնարավոր ելքը, իսկ Պուտինը հիշեցրել, որ Ռուսաստանը բաց է քաղաքական և դիվանագիտական կարգավորման համար, և ինքը չէ, որ դադարեցրել է բանակցությունները։
Ռուսաստանը և Չինաստանը, ինչպես ընդգծել է Սի Ցզինպինը, հաստատակամորեն պաշտպանում են միջազգային իրավունքի վրա հիմնված աշխարհակարգը, «իրականացնում են իրական բազմաբևեռություն՝ արդյունավետ քայլերով, և հանդես են գալիս նոր տեսակի միջազգային հարաբերությունների ձևավորման օգտին»։ Մոսկվան և Պեկինը, նշել է Պուտինը, համախոհների հետ միասին աջակցում են արդար աշխարհակարգին, որը հիմնված է միջազգային իրավունքի, այլ ոչ թե, այսպես կոչված, ոսկե միլիարդի սկզբունքների վրա։
Ռուսաստանը, հիշեցրել է Պուտինը, բաց է ուկրաինական ճգնաժամի քաղաքական-դիվանագիտական կարգավորման համար. «Սակայն դեռ 2022 թվականի ապրիլին խաղաղ բանակցությունները մեր կողմից ոչ մի կերպ չեն դադարեցվել»: Սի Ցզինպինը կրկնել է Չինաստանի դիրքորոշումն Ուկրաինայի հարցում և հիշեցրել է նախկինում առաջարկված փաստաթուղթը, որը, նրա խոսքերով, «արտացոլում է համաշխարհային հանրության տեսակետների միասնությունը ուկրաինական ճգնաժամի հաղթահարման վերաբերյալ»․ «Իրավիճակից ռացիոնալ ելք և երկարատև խաղաղություն տանող ուղի կգտնվի, եթե բոլոր կողմերն առաջնորդվեն ընդհանուր և կայուն անվտանգության հայեցակարգով, շարունակեն երկխոսությունն ու խորհրդակցությունները հավասար, խելամիտ և պրագմատիկ ձևով»։
