Ստեփանակերտի քաղաքապետ Դավիթ Սարգսյանը «Ֆեյսբուքի» իր էջում անդրադարձել է լրատվականում տեղ գտած այն հոդվածին, թե իր և Արցախի նախագահի միջև վիճաբանություն է տեղի ունեցել.

««ՀՐԱՊԱՐԱԿ»-ԻՆ ԻՐԱԿԱՆՈւԹՅՈւՆԸ ՀԵՏԱՔՐՔԻ՞Ր է                                               

«Հրապարակ»-ը, ապրիլի 14-ին տարածած «Ստեփանակերտի քաղաքապետն ու Արցախի նախագահը վիճե՞լ են» վերտառությամբ նյութում, ի մասնավորի, նշել է, թե Ստեփանակերտի քաղաքապետը վերջին շրջանում լարված հարաբերություններ ունի ԱՀ նախագահի հետ, անգամ՝ վիճաբանել են: Որպես Ստեփանակերտի քաղաքապետ՝ վստահեցնում եմ, որ այդ պնդումը իրականության հետ ոչ մի աղերս չունի: Ինչ վերաբերում է որպես պնդման ապացույց ներկայացված փաստին, թե Մարտակերտում շրջանի պատասխանատուների հետ նախագահի հանդիպմանը ես ներկա չէի, մեղմ ասած, լուրջ չէ: Խոստովանեմ, որ չեմ մասնակցել նաև Ասկերանում նույն ձևաչափով կայացած հանդիպմանը՝ այն պարզ պատճառով, որ դրանք նվիրված էին կոնկրետ շրջանների և այնտեղ առկա խնդիրներին, որոնք Ստեփանակերտի հետ որևէ առնչություն չունեն: Փոխարենը, որպես Ստեփանակերտի քաղաքապետ,  մասնակցում եմ այն հանդիպումներին ու քննարկումներին, որտեղ արծարծվում են նաև մայրաքաղաքին առնչվող թեմաներ: Դրանցից վերջինը Արայիկ Հարությունյանի նախագահությամբ տեղի ունեցած կառավարության նիստն էր՝ ապրիլի 9-ին, և նույն օրը նախագահի նստավայրում կայացած խորհրդակցությունը՝ պարենային անվտանգության թեմայով: Ակնկալում եմ, որ «Հրապարակ»-ը մասնագիտական պատասխանատվություն կցուցաբերի և կհերքի իր կողմից տարածված, ճշմարտությանը չհամապատասխանող տեղեկությունը: Խնդրում և հորդորում եմ՝ զերծ մնալ ավելորդ շահարկումներից: Վերջում հավելեմ, որ, ինչպես պատերազմից առաջ, պատերազմի ժամանակ, այնպես էլ այսօր, Ստեփանակերտի իշխանության օրակարգում չպակասող մարտահրավերների դեմ միասնական ուժերով արդյունավետ պայքարն է»: