Էլեկտրոնային առևտրի տարածման հետ միասին ստեղծվում են նաև առաքանիները արտերկրից Հայաստան բերող կազմակերպություններ։ Վերջինների մատուցած ծառայությունները, սակայն, միշտ չի, որ համապատասխանում են գովազդին և հաճախորդների ակնկալիքներին։
Radar Armenia-ն տեղեկացրել էր, որ Globbing Armenia ընկերությունը գովազդում է ծառայություն, որը, սակայն, չէր համապատասխանում խոստմանը. խոսքը առաքանիները չորս օրում հասցնելու մասին է։ Անգամ ՄՊՀ-ն այս փաստով վարույթ էր սկսել։
Հրապարակումից հետո մեզ հետ կապ հաստատեցին մի խումբ քաղաքացիներ՝ պնդելով, որ նման ծառայություն իրականացնող մեկ այլ կազմակերպություն՝ «Բեր-Բեր»-ը պարզապես խաբում են քաղաքացիներին՝ չառաքելով պատվերները։
Radar Armenia-ի հետ զրույցում «Բեր-Բեր»-ից տուժած քաղաքացի Գևորգ Հարությունյանն ասաց, որ մի խումբ քաղաքացիներ սոցիալական ցանցերից մեկում ստեղծել են «Չբեր-Բեր» խումբ և այդ դրանով պատրաստվում են ինչպես մամուլին ներկայացնել իրենց խնդիրները, այնպես էլ՝ իրավապահ մարմիններին։
Բանն այն է, որ «Բեր-Բեր» բեռնափոխադրող ընկերության բազմաթիվ հաճախորդների փաթեթներն արդեն մեկ ամիս է՝ պատշաճորեն չեն առաքվում։ Ընկերության կողմից սահմանված է առավելագույնը 10 աշխատանքային օր՝ փաթեթներն օդային տարբերակով ՀՀ հասցնելու համար։ Մի շարք հաճախորդների կարծիքով՝ հնարավոր է՝ ընկերությունը կորցրել է փաթեթները և դժվար էլ արդեն առաքի։ «Բեր-բեր»-ը ՀՀ օդային առաքման համար սահմանում է առավելագույնը 10 աշխատանքային օր, բայց տուժած երկու տասնյակ անձինք 1 ամիս է՝ չունեն ոչ մի հստակ ամսաթիվ, թե բեռները երբ մուտք կգործեն ՀՀ։
Մեր զրուցակիցը պատմեց, որ իր պատվերը առողջության համար խիստ կարևոր գնում է եղել, սակայն «Բեր-բեր»-ն այդպես էլ այն տեղ չի հասցնում՝ անհարմարություն և վնաս հասցնելով իր առողջությանը. «Մեր խմբում արդեն կա իրավաբան, նա կհավաքի փաստերը և դատարան կդիմի։ Մեր խմբում կա մարդ, ով մեծ պատվերներ է կատարել և մեծ գումարներ կորցրել։ Նա արդեն դիմել է ոստիկանություն։ Դեռ քննարկում ենք և նոր տուժողների հետ ենք փորձում ծանոթանալ։ Ես, որպես փոխհատուցում, այդ ապրանքի համարժեքն եմ ուզում՝ հենց հիմա, կամ՝ գնի չափով փոխհատուցում»,- ասաց մեր զրուցակիցը։
Radar Armenia-ն փորձեց կապ հաստատել նաև «Բեր-բեր» ընկերության հետ՝ վերջինիս կարծիքն ու մեկնաբանությունը ստանալու ստեղծված իրավիճակի վերաբերյալ, սակայն մեր բոլոր զանգերը մնացին անպատասխան։