Թուրքիայի արտաքին գործերի նախարար Մևլութ Չավուշօղլուն հինգշաբթի օրը հայտարարեց, որ ԱՄՆ պետքարտուղար Էնթոնի Բլինկենի հետ փոխայցելությունների շուրջ պայմանավորվածություն է ձեռք բերվել։ «Մենք հեռախոսային խոսակցություններ ունեցանք, ես Բլինքենին հրավիրեցի Թուրքիա՝ դիվանագիտական ֆորումի, նա խոստացավ նայել իր ծրագիրը։ Վաշինգտոն մեկնելով կցանկանայի քննարկել ընթացիկ խնդիրները։ Մենք պայմանավորվեցինք փոխայցելությունների մասին, ժամկետները կհամաձայնեցվեն ավելի ուշ»,- ասել է նախարարը TRT հեռուստաալիքին տված հարցազրույցում։
Վերջին անգամ ԱՄՆ պետքարտուղարը՝ ի դեմս Մայք Պոմպեոյի, աշխատանքային այցով Թուրքիա էր այցելել 2020 թվականի վերջին։ Սակայն, այն ժամանակ նա չհանդիպեց թուրք պաշտոնյաների հետ։ Փոխարենը Ստամբուլում նա բանակցել է միայն Բարդուղիմեոս պատրիարքի հետ։