Հասարակություն
«Մեզ մոտ որ թունել ես մտնում, ոնց որ քավարանի վերջին էտապը լինի». վարչապետ
Կառավարությունն ավելի քան 17 մլրդ դրամ հատկացրեց մի շարք ճանապարհների հիմնանորոգման և վերակառուցման համար:
ՀՀ վարչապետ Նիկոլ Փաշինյանը հայտարարել է, որ առիթ է ունեցել անցնելու Հյուսիս-հարավ մայրուղու Թալին-Լանջիկ հատվածով, որտեղ մի հատվածը վերջնական վիճակում է: Ըստ նրա՝ կարծես թե առաջին անգամ նոր ստանդարտի ճանապարհ է ստացվել. «Հայաստանում երբեք այդպիսի որակի և ստանդարտի ճանապարհ չի եղել, ինչը շատ կարևոր նորություն է: Նաև չափազանց կարևոր եմ համարում, որ մենք միջհամայնքային ճանապարհներում էլ ենք ուզում մոտենալ նոր ստանդարտի: Վերջերս առիթ ունեցա Հրազդան-Բջնի վերականգնված ճանապարհով անցնել, և իսկապես, այս բոլոր ճանապարհները մեզ համար Հայաստանը կարծես նորովի հայտնաբերելու միջոց են»,- ասել է Փաշինյանը:
Ինչ վերաբերում է թունելների լուսավորությանը, վարչապետի կարծիքով՝ թեև դրանցում լուսավորման ու վերականգնման որոշ աշխատանքներ արվել են, բայց ընդհանուր տեսքը «միջնադարյան վիճակ» է հիշեցնում. «Պայմանավորվել ենք, որ Ստեփանավանի, Ծովագյուղի ու Սպիտակի թունելը պետք է բերենք ամենաժամանակակից տեսքի։ Այլ երկրներում որ թունել ես մտնում, Թումանյանի ասած՝ «լիս աշխարհ» ես ընկնում, իսկ մեզ մոտ որ մտնում ես, ոնց որ քավարանի վերջին էտապը լինի»։
